ព្រឹកថ្ងៃមួយ​ចៅហ្វាយស្រី​បានប្រើ​អ្នកបម្រើ​របស់ខ្លួនឲ្យ​ស្ងោរធា​មួយក្បាល សម្រាប់​ធ្វើជា​អាហារថ្ងៃត្រង់។ នៅពេលនោះ អ្នកបម្រើស្រី​បានយក​ទា​ទៅដាក់​ក្នុង​ឆ្នាំង ដោយ​មិនបាន​ដាក់ទឹក​ធ្វើឲ្យ​ឆ្នាំង​ឆេះ​ផ្សែងហុយទ្រលោម។

នៅពេលឃើញ​ហេតុការណ៍​ដូច្នេះ ចៅហ្វាយស្រី​ក៍ស្រែកសួរឡើង៖
ចៅហ្វាយស្រី៖ ហេតុអ្វី​ឯង​មិនដាក់ទឹក​ក្នុង​ឆ្នាំង​ស្ងោរទា​អញ្ចឹង នាងមើល! ឥឡូវ​ឆេះខ្លោច​ខ្ទេចខ្ទីអស់។
អ្នកបម្រើស្រី៖ គឺនែ! មកពី​ខ្ញុំខ្លាចថា នៅពេលដាក់ទឹក​ចូល​ហើយ វានឹងហែលទឹក​គេចរត់បាត់ណា​លោកស្រី។
ចៅហ្វាយស្រី៖ អុញ!

នៅ​ឆ្នេរ​សមុទ្រ​មួយ​មាន​មនុស្ស​ងូតទឹក​លេង​យ៉ាង​ច្រើន​កុះករ​ទាំង​ប្រុស ទាំង​ស្រី។ ក្នុង​ពេលនោះ មាន​នារី​ជនជាតិ បារាំង​ម្នាក់​ដែល​កំពុង​ហែល​ទឹក បាន​របូត​ខោ​ប៊ីគីនី​របស់​នាង​បាត់។ ដោយ​មិនដឹង​ធ្វើ​យ៉ាងណា​ដើម្បី​ឡើង​គោក​វិញ​បាន ភ្លាម​នោះ​នាង​បាន​ឃើញ​ផ្លាក​ប្រាប់​ដំណឹង​មួយ​ផ្ទាំង ដែល​អណ្តែត​លើ​ផ្ទៃ​ទឹក នាង​ក៏​ស្រវា​យក​ផ្លាក​នោះ​មក​បិទបាំង​ពេល​ឡើង​គោក​វិញ។ ពេល​មក​ជិត​ដល់​ឆ្នេរ ស្រាប់តែ​មាន​ប្រុសៗ​នាំ​គ្នា​សើច ហើយ​មើល​សំដៅ​មក​ល្វែង​ក្រោម​របស់​នាង នាង​ឆ្ងល់​យ៉ាងខ្លាំង ក៏​អោន​មើល​ទៅ​ផ្ទាំង​ដែល​នាង​បាំង​នោះ ស្រាប់​តែ​ឃើញ​ពាក្យ​សរសេរ​ថា “កន្លែង​សម្រាប់​ប្រុសៗ” ភ្លាម​នោះ នាង​ក៏​អង្គុយ​ចុះ រួច​ត្រលប់​ផ្លាក​នេះ ហើយ​ដើរ​បន្ត​ទៀត។ ប្រុសៗ​នៅតែ​សើច​ដដែល ព្រោះ​ផ្លាក​ដែល​នាង​បាន​ត្រលប់​នោះ នៅ​ម្ខាង​ថ្មី​សរសេរ​ថា “ជម្រៅ ២ ម៉ែត្រ”។

មាន​បុរសម្នាក់​ពូកែ​ខាង​ខិលខូច លួច​ទ្រព្យសម្បត្តិ​គេ ហើយ​ក៏ត្រូវ​នគរបាល​ចាប់យកទៅ​អប់រំ។ ពេល​ចេញមក​វិញ ដោយ​ខ្លាច​ប្រជាជន​ស្គាល់​មុខ គាត់​ក៏បាន​ទៅ​បួស​នៅ​វត្ត​ដាច់ស្រយាល​មួយ។
 
ថ្ងៃមួយ​គាត់​ផឹកស្រា គាត់​ក៏​ទៅ​កាប់មាន់​មក​ក្លែមស្រា តែពេល​កំពុងបោច​រោមមាន់​ស្រាប់តែ​ចៅអធិការវត្ត​មកដល់។
ចៅអធិការ៖ នែ​នេន! តើ​នេន​កំពុងធ្វើអ្វី​ហ្នឹង? ដឹងទេ​ថា​ខុសនឹង​វិន័យ​សង្ឃ!
លោកនេន៖ ករុណា​ព្រះតេជគុណ អត្មា​មិនមែន​ស្ងោរមាន់​ក្លែមស្រា​ទេ គឺ​មាន់នេះ​វា​ប្រាប់​អត្មា​ថា វា​ចង់​បួស​ទើប​អត្មា​បោចរោម​តាម​បំណង​វា​ទៅ។
ចៅអធិការ៖ អុញ!!!!