ការសិក្សារបស់អង្គការសប្បុរសធម៌មួយបានលើកឡើងថា ការប្ដូរពីការទទួលទានស្រាធម្មតាមួយកែវរៀងរាល់ថ្ងៃ មកយកជម្រើសស្រាដែលមានកម្រិតអាល់កុលខ្សោយជាងនេះអាចគ្រប់គ្រាន់ក្នុងការកាត់បន្ថយអត្រាកើតជម្ងឺមហារីកមួយចំនួន។
អង្គការមូលនិធិស្រាវជ្រាវជម្ងឺមហារីកពិភពលោកបានឱ្យដឹងថា ការសិក្សាបានលើកឡើងថា អ្នកដែលទទួលទានស្រាដែលមានបរិមាណអាល់កុលត្រឹម ១០ភាគរយជាជាងស្រាធម្មតាដែលមានអាល់កុល ១៤ភាគរយនោះ អាចនាំមកនូវអត្ថប្រយោជន៍។
អង្គការសប្បុរសធម៌មួយនេះបានអំពាវនាវឱ្យមានការផលិតស្រា និងស្រាបៀរដែលមានជាតិអាល់កុលកម្រិតទាបសម្រាប់ដាក់លក់នៅតាមទីផ្សារឱ្យបានច្រើនជាងនេះ។
អ្នកឯកទេសក្នុងឧស្សាហកម្មនេះម្នាក់បាននិយាយថា អ្នកទទួលទាននៅអង់គ្លេសកំពុងតែសួររកស្រាដែលមានកម្រិតអាល់កុលស្រាលជាងនេះ។
ការគណនា គឺផ្អែកទៅលើតួលេខក្នុងរបាយការណ៍ឆ្នាំ២០០៧ ដែលតាមដានភស្តុតាងចំពោះទំនាក់ទំនងរវាងការទទួលទានស្រា និងជម្ងឺមហារីក។
របាយការណ៍នេះបានណែនាំថា បុរសគួរទទួលទានមិនលើសពី ២កែវក្នុងមួយថ្ងៃ ហើយស្ត្រីមិនគួរទទួលទានលើសពី ១កែវទេ។
តួលេខដែលគេប្រើដើម្បីធ្វើការសន្និដ្ឋាន គឺលម្អិតគ្រប់គ្រាន់ដើម្បីបង្ហាញនូវអត្រាគ្រោះថ្នាក់បន្ថែម ដែលបង្កឡើងដោយសារកម្រិតជាតិអាល់កុល ១០ក្រាមបន្ថែមទៀតដែលគេទទួលទានជាប្រចាំ។
ផ្ដើមចេញពីនេះ ក្រុមអ្នកវិទ្យាសាស្ត្របានគណនាថា តាមទ្រឹស្ដី អ្នកដែលទទួលទានស្រា ១កែវដែលមានចំណុះ ២៥០មីលី្លលីត្រក្នុងមួយយប់ នឹងកាត់បន្ថយអត្រាកើតជម្ងឺមហារីកពោះវៀនបាន ៧ភាគរយ ប្រសិនបើពួកគេជាធម្មតាទទួលទានស្រាដែលមានកម្រិតអាល់កុល ១០ភាគរយ ជាជាងទទួលទានស្រាដែលមានកម្រិតអាល់កុល ១៤ភាគរយ។
នេះគ្រាន់តែជាការកាត់បន្ថយអត្រាគ្រោះថ្នាក់បន្តិចបន្តួចសម្រាប់បុគ្គលម្នាក់ ហើយគ្មានភស្តុតាងច្បាស់លាស់អំពីថា តើមនុស្សម្នាក់នឹងត្រូវការទទួលទានស្រាដែលមានកម្រិតអាល់កុលខ្សោយមុនយូរប៉ុនណាសម្រាប់ការទទួលទានធម្មតារបស់ពួកគេ ដើម្បីទទួលបានអត្ថប្រយោជន៍នេះ។
ទោះយ៉ាងណាអង្គការមនុស្សធម៌នេះនិយាយថា សម្រាប់មនុស្សទាំង ១០០នាក់ដែលធ្វើដូច្នេះ ករណីមួយនៃជម្ងឺមហារីកពោះវៀននឹងត្រូវបានគេចផុត៕
(ដកស្រង់ពីកាសែត រស្មីកម្ពុជា ឆ្នាំទី ១៨ លេខ ៥១៧៧ ថ្ងៃទី ២១ ខែ មេសា ឆ្នាំ ២០១០)
